الحكم لمن غلب، اضرب خمس ست فنجاين قهوة علشان تجمع الكلمتين دول
عز الدين أيبك بعد ما اتقتل مسك ابنه علي الحكم
قطز عزله ونصب نفسه سلطان وراح يحارب المغول
وهو راجع بيبرس قتله واتنصب سلطان على مصر مكانه،
بيبرس لما مات مسك ابنه السعيد بركة خان الحكم فالأمراء
خلعوه وعينوا أخوة سلامش مكانه.
سلامش كان لسا طفل وقتها واللي عزل أخوه واتحكم فيه وهيعزله كمان شوية قلاوون الألفي اللي الظاهر بيبرس جوزه بنته علشان يضمن انه ما ينقلبش على اولاده.
المهم قلاوون مسك الحكم من هنا وأسس أسرة حكمت مصر حوالي ١٠٠ سنة من وقتها برعايته ورعاية أبنائه.
ولي العرش بتاع قلاوون كان ابنه الكبير علاء الدين علي، كتير من الكتب بتقول ان أخوه خليل سمه علشان يمسك الحكم هو بعد والده ، والده قلاوون مات ورفض يوليه بعده في لحظاته الأخيرة، لما مات الامراء بايعوه فقال منعني أبي وأعطاني الله ، خليل دا يبقى الأشرف خليل فاتح عكا ومنهي وجود الصليبيين في بلاد الإسلام.
المهم خليل اتلم عليه ٤ من المماليك وقتلوه واحد منهم هبفلت من الاعدام وهيبقى سلطان بعد كده، لما اتفتل خليل المماليك ولُّو أخو الصغير محمد الحكم كان طفل صغير لسا ٨ سنين بعدها بفترة خلعه كتبغا ونصب نفسه سلطان مكانه.
كتبغا ما كانش محبوب فالمماليك قررو يخلصوا منه على طول فلما عرف هرب، وعين الممالك مكانه حسام الدين لاجين سلطان على مصر، حسام دا واحد من اللي قتلوا الأشرف خليل بن قلاوون.
حسام الدين لاجين قاعد في مجلسه لا بيه ولا عليه دخل عليه اتنين امراء واحد اسمه طغجي والتاني كرجي وقتلوه، نجيب مين سلطان ....
الناصر محمد بن قلاوون
ورجع سلطان للمرة التانية
ومعاه الأمير سلار نائب وبيبرس الجاشنكير استادار
سلار وبيبرس ضيقوا عليه لحد ما زهق منهم وسابلهم الحكم وخلع ،بيبرس الجاشنكير عين نفسه سلطان وسلار نائب له
بيبرس كان مشروع سلطان كويس بس كان متسرع وأهبل
لما عرف ان الناصر جاي يرجع الحكم فتح الخزانة وأخد الدهب وهرب واتقبض عليه واتقتل ورجع الناصر محمد يحكم مصر للمرة التالتة اللي هتستمر فترة طويلة لأن الطفل الصغير دا كتن نضج وهيبقى أسد وغول حكم بعد كده الا ان أولاده مش هياخدوا من نصيب سيرته حاجه
ربما بسبب تكرر نفس الظروف وتحكم المماليك فيهم .
الناصر محمد بن قلاوون حكم من اولاده وأحفاده ١١ واحد لمصر ولهم قصص تانية كتير نتكلم عنها في وقت تاني
أخر واحد فيهم كان السلطان حاجي اللي بسقوطه سقطت دولة المماليك البحرية اللي كل اللي فاتوا دول تبعها وبدأ القسم التاني من دولة المماليك اللي اتعرفت بالمماليك الجراكسه تحت على ايد السلطان برقوق .
برقوق لما مات حكم بعده ابنه فرج
في عهد فرج كان في نزاع مع المغول
فجمع الجيش علشان يتحركوا للشام
بس المشكلة لما الجيش اتجمع مالقوش السلطان علشان يخرج على راسه
فين فرج فرج فص ملح وداب
فما كان من المماليك الا انه انهم عينوا أخوه عبد العزيز بن برقوق
بعد شهرين رجع فرج ومسك الحكم تاني لحد ما مات مقتول في الشام واترمت جثته للكلاب .
مين السلطان مافيش سلطان فتم تنصيب الخليفه العباسي اللي مقيم في مصر من وقت سقوط بغداد قبلها بمئات السنين، الخليفه دا كان المستعين حكم شوية لحد ما جه المؤيد شيخ عزله وعين نفسه سلطان على الديار المصرية.
وريث المؤيد شيخ كان اسمه ابراهيم المماليك قعدوا يوسوسو للمؤيد لحد ما حط السم لابنه وقتله ومات بعدها حزنا عليه واندفن جنبه.
وهو بيموت وصى سيف الدين ططر على ابنه الرضيع اللي هيمسك الحكم بعده، اول الراجل ما مات ططر اتجوز مراته وام السلطان الرضيع واخد منه الحكم وبعدين طلقها .
ططر وهو بيموت وصى واحد اسمه برسباي على ابنه محمد الطفل اللي هيبقى سلطان برسباي قاله موت واستريح
اول ما مات برسباي خلع الطفل وتسلطن مكانه
برسباي وهو بيموت ساب ابنه عنده ١٤ سنه
فطلع واحد اسمع جقمق طرده مسك الحكم
جقمق وهو بيموت ساب ابنه طفل ووصى عليه اينال
اينال استنى ٤٠ يوم وخلع الطفل واتسلطن مكانه
اينال وهو بيموت ساب ابنه عثمان وساب واحد مستقوي اسمه خشقدم في البلد ،خشقدم انقلب على عثمان ومسك الحكم لحد ما بلباي المجنون اتقلب على خشقدم وحكم حبه
ظهر واحد اسمه خير بك اتقلب على بلباي وبعدين قايتباي اتقلب على خير بك بعد ما صبر على حكمه ليله كاملة
قايتباي كان سلطان عظيم بس محمد ابنه كان خيبتها
لما مات قايتباي مسك ابنه وافترى في الناس والعباد
لحد ما المماليك اتأنروا على قتله بقيادة خاله
ابو سعيد قنصوه اللي بقى سلطان بعد كده واشتهر باسم السلطان ماعرفش.
قنصوه هرب في زي النساء بعد ما عرف ان المماليك هيخلعوه ، واتسلطن بعده جانبلاط.
جانبلاط اتخلع بعد ست شهور ومسك بعده العادل طومان باي اللي اتخلع بقيادة قنصوة الغوري اللي اتقتل في مرج دابق وحكم بعده الأشرف طومان باي اللي اتعدم على باب زويلة وانتهت بموته دولة المماليك ودانت مصر بعدها بالتبعية للدولة العثمانية وسبحان من له الدوام.
منقول
الخلاصة... إن اللي عايز يبقى سلطان يصحى بدري وماينمش لان لو نام مش هيصحي.
الرئيسية 
